“Република Македонија како дел од регионалните иницијативи за соработка, го издигнува како еден од најважните елементи на својата надворешна политика, односот на постигнување на критериумите за пристапување во евро-атлантските структури. Во таа насока, главен приоритет на Република Македонија е сегментот на справување со илегалната миграција, злоупотреба на визната либерализација, а со тоа и намалување на барателите на азил од Република Македонија“, истакна меѓу другото, заменик министерот за внатрешни работи Џељаљ Бајрами во своето денешно обраќање на МАРРИ Форумот што вчера и денес се одржува во Сараево, Босна и Херцеговина а во организација на МАРРИ Регионалната иницијатива за миграција, азил и бегалци и министерството за безбедност на БИХ.
Притоа заменик министерот Бајрами се осврна на низата аспекти на меѓународна соработка вклучително и соработка што се остварува преку МАРРИ Регионалниот центар како образец на стратешко делување на МВР којшто треба и во иднина да се развива како на билатерално така и на мултилатерално рамниште.
„Согледувајќи ги придобивките од постоењето на МАРРИ Регионалниот центар, Република Македонија и Министерството за внатрешни работи, остануваат еден од главните поддржувачи на проектите на оваа Иницијатива, давајќи натамошен силен импулс во унапредувањето на регионалната, но и на пошироката европска безбедност“– потенцираше заменик министерот Бајрами.
Инаку, МАРРИ Форумот на кој што присуствуваат претставници на Република Македонија, БИХ, Република Црна Гора, Република Србија Република, Албанија и Република Хрватска, претставува исклучителна прилика за разговор околу сите активности поврзани со законските миграции, за продолжување на заедничката борба против илегалната миграција и прашања од областите кои се од големо значење за сите земји во регионот во процесот кон пристапување во Европската Унија.