Германската полиција ги предупреди корисниците на интернет за појава на компјутерски вирус кој ги обвинува жртвите за гледање на детска порнографија и се обидува да им наплати казна од 100 евра.
Вирусот, на екранот од заразениот компјутер прикажува известување во кое се тврди дека на тој компјутер е гледана детска порнографија и дека има пиратски содржини. Потоа Windows-от се блокира, а може да се отклучи само ако сопственикот плати казна од 100 евра.
Вирусот е направен да изгледа како германската служба за наплата на авторски права и како националната агенција за компјутерска безбедност.
Федералното полициско одделение за борба против криминал, вели дека се работи за „дигитална изнуда“ и дека жртвите не треба да платат, под никакви услови. Препорачуваат корисниците да ги активираат своите антивирусни програми и редовно да ги надградуваат.
Експертите за компјутерска безбедност велат дека ова е прв пат што некој се обидел на ваков начин да проба да изнуди пари од корисниците на интернет. Претходно имало некои слични обиди на изнуда за наводно користење пиратски филмови и музика.