Претставници на Македонскиот сојуз – заедница на иселеници во Шведска, попладнево имаа средба со министерката за култура Елизабета Канческа-Милевска во Амбасадата на Република Македонија во Стокхолм.
Министерката им се заблагодари за нивните активности со кои ја промовираат Македонија и за нивните идни проекти кои ќе бидат поддржани од Министерството за култура.
„Разговаравме за издавачката дејност и за превод на македонски автори на шведски јазик и обратно. Ги информирав за сите инвестиции и активности што ги реализираме. Посебно ми е драго што во втората половина на годинава во Шведска ќе имаме и изложба на оригинали на стари словенски ракописи. Разговаравме за простор, соодветна институција или музеј каде тие соодветно ќе бидат изложени. Разговаравме и за одбележувањето 40 години од постоењето на црковната заедница во Шведска, што ќе биде реализирано со поддршка на Министерството за култура“, рече Канческа-Милевска.
Македонскиот сојуз е со седиште во Гетеборг, градот во кој заедно со Малме има најмногу иселеници од Македонија.
Претседателот на Сојузот Јован Божиновски рече дека во Шведска ги има околу 16 илјади.
„Македонскиот сојуз како највисоко тело во организираниот живот на македонската заедница во Шведска ги пренесе нашите досегашни активности, успесите, но и некои прашања кои во иднина треба да се подигнат на повисоко ниво. Благодариме што министерката не сослуша и што ќе се заземе да се подобрат резултатите во сферата што е во надлежност на Министерството за култура. Благодарни сме му и на Кралството Шведска што ни овозможи да постоиме како заедница“, рече Божиновски.
Тој им се заблагодари и на организации кои го финансираат опстојувањето на Сојузот. Меѓу нив е и институцијата за образование и култура АБФ (Работнички образовен сојуз), чиј претставник Реза Талеби, кој е и генерален секретар на Македонскиот сојуз, присуствуваше на денешната средба.
Милан Стојчевски, претседател на црковната општина „Св. Кирил И Методиј“ во Гетеборг, ги покани сите Македонци од дијаспората на 26 октомври да им се придружат во одбележувањето четири децении од нивното постоење.
Министерката Канческа-Милевска денеска престојува во Стокхолм, каде што ансамблот Танец вечер ќе одржи концерт по повод 20 години дипломатски односи меѓу Македонија и Шведска.