Синоќа, пред 55 присутни полнолетни жители на село Елшани, во просториите на ОУ „Свети Наум Охридски“ во Елшани се одржа изборно собрание од кое се предложија и утврдија новите членови на Советот на месна Заедница Елшани.
Најпрвин се избра работно тело во кое беа предложени именувани: претседавач, записничар и лице кое ги броеше гласовите од присутните. Новоизбраниот претседавач, проф. Димче Донески ја отвори изборната седница по упатствата на претставниците од Локалната самоуправа кои го надгледуваа гласањето и изборот на новите членови на Советот на МЗ Елшани. На предлог на претседавачот беше прифатено и одлучено идниот совет да брои 7 члена кои потоа сами ќе го изберат претседателот на Советот на МЗ.
Предлагањето и гласањето заврши регуларно, а по повеќе предлози и неприфаќања на предлозите од страна на предложените, сепак бројката на утврдени предлози беше токму 7 членови, меѓу кои се најде и досегашниот, сега веќе поранешен долгогодишен претседател Крсте Ламбески, а другите шест се: Илија Стојоски, Илија Кордоски, Љубе Кордоски, Петре Матлиоски, Игор Шопоски и Кире Рубаноски.
Изборната седница заврши со порака: Новоизбраниот Совет да соработува секогаш со Локалната Самоуправа и со Институциите на Државата Македонија за подобро живеење и за подобрување на живеењето во Елшани.
