Рекордно ниски температури во САД

Рекордно ниски температури зафатија делови од САД, каде сообраќајот е отежнат поради силниот ветар и високата снежна покривка, која на места достигнува висина и до 30 сантиметри.

Властите ги затворија школите во повеќе градови вклучувајќи го Чикаго, Сент Луис и Милвоки и предупредуваат граѓаните доколку можат да не излегуваат од своите домови.

Во Северна Дакота измерени се 35 степени под нулата, додека пак во Медисон и Висконсин 21 степен под нулата, а во Минеаполис, Индијанаполис и Чикаго 15 степени под нулата.

Метеоролозите предупредуваат дека поради студениот бран проследен со силен ветар, температурата може да падне дури и до 50 до 60 степени под нулата.

Градоначалникот на Индијанаполис прогласи највисок степен на вонредна состојба во сообраќајот, што значи дека возењето се забранува, а исклучок се само итните случаи. Таква мерка последен пат била применета за време на снежната бура во 1978 година.

Голем број патишта се затворени, а на аеродромите откажани се повеќе од 1000 летови.

Метеоролозите соопштуваат дека ладниот воздух кој се формира над Северниот пол и поларните региони, најчесто се задржува во Канада, но овој пат стигна и до САД.

Врнежите од снег, силниот ветар и ниските температури, одзедоа повеќе од 16 животи во САД, а повеќето од нив настрадале во сообраќајни незгоди.