Откриени неправилности во работењето на пет обложувалници на подрачјето на СВР Охрид

Со цел контрола врз нелегални обложувалници, вчера заедничка координирана акција, СВР Охрид реализира со УЈП. Контрола беше извршена во дваесет обложувалници во Струга, Кичево, Дебар и Центар Жупа, при што во вкупно пет објекти-обложувалници беа констатирани прекршоци согласно законот за игри на среќа и забавни игри.

Една обложувалница во Центар Жупа и две обложувалници во кичевските села Зајас и Грешница приредувале игри на среќа без лиценца односно без дозвола од надлежен орган. Во обложувалницата во општината Центар Жупа одземени се 5 телевизори, 2 компјутери, еден принтер, 4548 денари и друга опрема, од обложувалница во селото Зајас одземени се 2 телевизори, 2 компјутери, еден принтер, 1880 денари и друга опрема а во с.Грешница одземени се 2 телевизори, 2 компјутери и 3 принтери. При контрола во обложувалница во селото Зајас констатирано е дека обавува дејност без регистрирана фирма за што се изречени глоби врз основа на законот за регулирање на готовински промет.

Неправилности се констатирани и во обложувалници во струшките села Подгорци и Долно Татеши каде поради немање фискален апарат, една обложувалница е затворена до 30 дена.

Во согласност со Законот за игрите на среќа и забавните игри, према правните лица каде се констатирани неправилности, ќе бидат и поднесени кривични пријави.