Мето Јовановски почесен доктор на ЕСРА

По повод почетокот на новата академска година, денеска во просториите на Универзитетот за аудиовизуелни уметности се одржа свечена церемонија на која беа доделени индексите на новозапишаните студенти, како и дипломи на завршените студенти на додипломските и постдипломските студии.

На церемонијата во присуство на многубројните гости, меѓу кои и министерката за култура Елизабета Канческа-Милевска, ректорот Јордан Плевнеш му ја врачи на актерот Мето Јовановски титулата почесен доктор на Универзитетот за аудиовизуелни уметности (ЕСРА) – Doctor Honoris Causa. Притоа Плевнеш рече: „некогашната и денешната трагедија се брануваат од играта на едниот, единствениот, неповторливиот, само нему сличниот, возвишениот Мето Јовановски, кој ги запиша Скопје и Македонија на европската и светската театарска сцена“.

Упатувајќи благодарност до Универзитетот што на овој начин е вброен заедно со плејадата имиња кои претходно се здобиле со највисокото универзитетско звање, како: Јиржи Менцел, Шарл Азнавур, Мики Манојловиќ, Александар Морфов, Абдулах и други, актерот Јовановски во својот говор го цитираше големиот театролог Станиславски: „Да се сака и почитува театарот во себе, а не себеси во театарот“.

На свеченоста беше промовирана и новата класа по актерска игра што ќе ја води токму Мето Јовановски, кој своето искуство и знаење ќе го пренесе на идните генерации македонски театарски и филмски актери.

DSC_0060 DSC_0080 DSC_0182