Засилени контроли на увозот на овошје и зеленчук

Со отпочнување на новата производствена сезона на овошје и зеленчук се зголемува и увозот на овие земјоделски производи во земјава. Поради зголемена фреквенција на пратки од регионот, Агенцијата за храна и ветеринарство ги засили инспекциските контроли на граничните премини.

Со цел да се спречи увоз на небезбедни производи на домашниот пазар и да го заштити здравјето на потрошувачите во Република Македонија, инспекциските служби на Агенцијата за храна и ветеринарство во изминатиов период забранија увоз на неколку пратки со овошје и зеленчук кај кои со лабораториско испитување беше констатирано зголемено присуство на пестициди над максимално дозволените концентрации. Направена е анализа на ризик врз основа на добиените резултати од лабараториските испитувања на увозни пратки овошје и зеленчук кај кои се констатирани недоследности, врз основа на што се зајакнати контролите при увоз.

Во интерес на заштита на здравјето на потрошувачите, покрај засилените инспекциски контроли, Агенцијата за храна и ветеринарство го зголеми и бројот на мостри за лабораториско испитување на безбедноста на овошјето и зеленчукот кои се увезуваат во Република Македонија. Ваквата пракса, во интерес на безбедноста и здравјето на граѓаните ќе продолжи и во иднина.

Зголемениот број на пратки кои се увезуваат во земјава нужно бара и повеќе време за вршење на инспекциските контроли и за земање на мостри за лабораториско испитување на овошјето и зеленчукот. Секоја пратка, вклучително и овошјето и зеленчукот, по добивањето на уреден резултат од лабораториското испитување со кое се потврдува безбедноста, без никаков застој веднаш се пласира на пазарот во Република Македонија.

Инспекциските контроли се спроведуваат на сите гранични премини, за секоја пратка со овошје и зеленчук, независно од земјата на потекло на пратката.