Концерт на „Хортус Музикус“ од Естонија на Охридско лето

Вечерва, во 21 часот, во црквата „Св. Софија“ во Охрид, во рамките на програмата на фестивалот „Охридско лето“, концерт ќе одржи камерниот оркестар „Хортус Музикус“ од Естонија.

„Хортус Музикус“ е еден од најстарите ансамбли во Источна Европа. Основан е во 1972 година од страна на неговиот уметнички директор и диригент Андрес Мустонен, и оттогаш постојано е присутен на светските концертни сцени во Соединетите Американски Држави, Јужна Америка, голем број европски земји, Израел, Русија и Јапонија. На репертоарот на овој ансамбл, покрај останатите дела, се наоѓа и музика која датира уште од VIII век – Грегоријански напеви, органуми, средновековни литургии, химни и мотети, дела на композиторите од Франко-фламанската школа итн. И современата музика е дел од нивните концертни програми. Имено, повеќе современи композитори имаат создадено дела посветени токму на овој ансамбл.

На програмата ќе бидат изведени „Кармина Бурана“ од Карл Орф и традиционални еврејски песни.