Градоначалникот Никола Бакрачески, денес, оствари средба со Амбасадорот на Унгарија во Македонија, Ласло Иштван Дукс. На средбата Амбасадорот Дукс, му најави на градоначалникот дека Унгарија ќе отвора почесен конузлат во Охрид. Подготовките се во тек, а конзулатот се очекува да биде отворен во месец Октомври. Овој конзулат ќе биде петти, откако претходно свои конзуларни претставништва во Охрид отворија, Полска, Словенија, Турција и Русија.
Градоначалникот Бакрачески рече дека се радува на отворањето на Унгарскиот конзулат преку кој ќе се создадат можност за продлабочување на соработката со градот Веспрем со кој веќе подолго време се негуваат добри релации. Понатака се разговараше за можноста да се организира туристичка промоција на Охрид во Будимпешта и учество на големиот туристички саем. Исто така беше разговарано за поврзување на унгарските тур оператори со туристичките работници од Охрид, но и можноста за воведување на директни авионски летови. Градоначалникот Бакрачески пред Амбасадорот Дукс ги презентираше и можностите за алтернативен туризам кои ги нуди Охрид.
Неодамнешното отворање на изложбата на унгарските уметници е добар знак за унапредување на соработката во областа на културата, преку учество на унгарски музички уметници на Охридско лето, како и организирање на унгарски вечери во Охрид.
