Кубанскиот лидер и револуционерна икона Фидел Кастро почина на 91 година од животот, објави кубанската државна телевизија. „Ел команданте“ ја изгуби битката со болеста.
Неговата смрт претставува крај на една ера и заминување на еден од најголемите, најпознатите и најконтроверзните светски лидери.
„Командантот на кубанската револуција почина ноќеска во 22.29 часот“ – соопшти неговиот брат и претседател на Куба, Раул Кастро. Во Куба ќе биде прогласена неколку дневна жалост.
Кастро, човекот кој го симна од власт диктаторскиот режим на Флугенсио Батиста и ја „врати Куба на народот“, бил обожаван во поголемиот дел на земјата која ја водеше 50 години, пред да му го препушти претседателското место на својот брат Раул во 2008 година поради неговата болест.
Но другиот дел од жителите на Куба, како и поголемиот дел од западниот свет на Кастро гледаа како на диктатор и лидер кој немилосрдно ја гушеше секоја опозиција, го затвараше и убиваше сопствениот народ.
Кастро во 1953 година беше затворен поради спротивставување на Батиста, но по излегување од затворот заедно со Че Гевара, го покрена народот на Куба во една од најпознатите светски револуционерни движења и стигна на власт после повеќегодишна герилска битка.
Кастро влезе во конфликт со САД и во 1962 година беше централна фигура на случувањата кои донесоа страв од нуклеарна војна. Тој дозволи Советскиот сојуз да им одговори на Американците на ширењето на вооружување во Европа со поставување на балистички ракети со нуклеарни боеви глави во Куба.
Кубанскиот претседател успеа за пет децении владеење да преживее неколку атентанти, како и безброј лажни вести за неговата смрт.
Информации за приватниот живот на Фидел Кастро се многу ретки, најмногу затоа што деталите не можеа да ја поминат строгата контрола на кубанските државни медиуми. Познато е дека Фидел имал два брака, во првиот добил син Фиделита, а во другиот имал пет деца.
Извор: meta.mk