Поради маргината на грешка што програмата ПВТ (паралелно пребројување на гласовите) ја продуцира, од граѓанската асоцијација „Мост“ соопштија дека не се во можност да ја проектираат распределбата на мандати по изборни единици.
„Ја повикуваме јавноста на трпение сè додека ДИК не ги објави првичните резултати од изборите. Внимателно ќе ја следиме работата на ДИК во наредниот период и ќе ја известуваме јавноста за сите активности“, соопштуваат од „Мост“.
Од асоцијацијата направија преглед на процентуално освоените гласови на коалициите и на политичките партии според изборни единици со маргиналната грешка што ја предвидуваат.
„Врз основа на нашите резултати, заклучуваме дека двете водечки партии по бројот на освоени гласови се преблиску една до друга и оваа разлика во распределбата на мандати, во зависност од маргината на грешка, влијае на тоа кој ќе освои најмногу мандати“, заклучуваат од „Мост“.
Извор: meta.mk