Три лица повикани на разговор во врска со инцидентите од Собранието на Македонија

Во врска со немилите настани што се случија на 27.04.2017 година во Собранието на Република Македонија, на 05.05. и 06.05.2017 од страна на Секторот за внатрешни работи Скопје во соработка со Основното јавно обвинителство преземени се мерки и активности за идентификување на други лица учесници во настаните. На 05.05.2017 година на службени разговори биле повикани уште три лица, две од Скопје и едно од Велес. Од страна на Јавниот обвинител била дадена насока, по завршување на потребните проверки и службени разговори, лицата да бидат пуштени од полициска станица, а документираниот доказен материјал за истите, во нареден, претходно договорен, период во просториите на Основното јавно обвинителство да им биде презентиран. По разгледувањето на презентираниот доказен материјал во Основното јавно обвинителство, од нивна страна ќе бидат дадени насоки кога да им се поднесе кривична пријава и на кој начинот ќе се обезбедат истите лица, во смисла дали ќе бидат повикани или ќе бидат лишени од слобода со претходно издадени наредби од Основното јавно обвинителство.

Секторот за внатрешни работи Скопје во консултација и соработка со Основното јавно обвинителство Скопје и понатаму презема мерки и активности во врска со настаните што се случија на 27.04.2017 година во Собранието на Република Македонија и обезбедување на преостанатите кривично пријавени лица, како и на идентификација и документирање и на други лица учесници во настаните.