На репертоарот на годинешното 57- мо издание на фестивалот „Охридско лето“ денеска е театарската претстава – концертно шоу „ Меџик Нешнл“ во изведба на Националниот театар „И.Л. Карагиале“ од Букурешт, Романија.
Националниот театар се смее, пее и танцува во едно театарско шоу, и е уште една прилика да се осврнеме на радоста на една вечно нова и носталгична музика. Со ретро провејување, но во современ ритам, концерт-шоуто ќе донесе познати актери, без маска, само со музика.
Ќе биде откриена една Едит Пјаф, мајсторски испеана од страна на Анка Сигартау, публиката ќе се сретне со Тања Попа во страсни фрагменти од обемниот руски репертоар, а нишки од борбениот Букурешт ќе одекнат од романсите, мистериозно пренесени од Ајлин Кадар. Mедееа Маринеску и Мариус Маноле предлагаат една уметничка одисеја, која ќе нè оддели од здодевното секојдневие и ќе нè понесе во светот на музиката која го топли срцето и прошепотените зборови. Иштван Теглас, Едуард Адам и Лари Гиоргеску ќе раскажуваат приказни за животот и уметноста, кои не можат да се опишат со зборови: пантомима, импровизација и кореографија. Најмладите учесници, Емилијан Mарнеа, Петре Aнкута и Флорин Калбајос ќе ве изненадат со најкусиот, највеселиот и најритмичкиот концерт, придружени од дузина инструменти.
Домаќин на вечерта е Јон Карамитру, кој во негова режија ветува едно поинакво музичко изненадување.
Јон Карамитру е роден на 9 март 1942 год. во Букурешт.Тој е романски актер, режисер и политичка фигура. Бил министер за култура во периодот од 1996 до 2000 година. Дипломирал на Институтот за театарска и филмска уметност „И.Л. Карагиале“ во 1964 година. Неговото име се појавува во повеќе од 30 филмови, почнувајќи од 1964 година, па сè до 2004 година. Негови најпознати улоги се во филмовите: „Утрата на доброто момче“ (1966), „Залената трева на домот“ (1978), „Стефан Лучијан“ (1981), и „Средношколци“ (1985-1987), како и многу помали улоги во странски филмови.
Директор е на Националниот театар „И.Л Карагиале“ во Букурешт од јуни 2005 година. Претседател е на УНИТЕР – Унија на романски театри – од 1990 година. Од 1990 до 1993 година работи како директор на театарот „Лучија Стурѕа Буландра“ во Букурешт. Номиниран е и наградуван за повеќе негови остварувања и улоги.
Претставата и концертно шоу „Меџик нешнл“ ќе се одигра во предворјето на црквата „Света Софија“ со почеток во 21 часот.