Министерот Спасовски на Завршната министерска конференција за проектот „Борба против организираниот криминал“

Свесни сме дека последиците од дејствувањето на криминалните групи не предизвикуваат само економски последици туку тие сериозно ги загрозуваат и безбедноста, национална и регионална и токму затоа заедничката посветеност и успешна соработка треба да бидат високи приоритети за нашите земји, рече министерот за внатрешни работи Оливер Спасовски во своето обраќање на Завршната министерска конференција за проектот „Борба против организираниот криминал: Меѓународна соработка во кривичното право“, во Трст, Република Италија.

Проектот се реализираше како регионален проект ИПА 2014, а како негов носител од страна на ЕК беше назначено италијанското министерство за внатрешни работи и е наменет за полициите на Македонија, Албанија, Србија, Црна Гора, Косово и Босна и Херцеговина.

“Овој проект имаше за цел подобрување на меѓународната стратешка и оперативни соработка, односно оперативно да се поддржат меѓународните истраги и гонења, да се унапреди безбедната размена на информации и разузнавачки сознанија, да се поттикне употребата на современата технологија за комуницирање и механизмите за заштита на податоците, усогласени според стандардите на ЕУ“, рече министерот Спасовски.

Министерот Спасовски посочувајќи ја неспорната важност, но и успешна реализација на овој проект, нагласи дека бенефитите се видливи во повеќе сегменти, почнувајќи од подобрување на капацитетите на органите за спроведување на законот во земјите кориснички за спроведување прекугранични и меѓународни заеднички полициски операции и истраги, потоа поквалитетна и поинтензивна размена на информации и податоци, па се до унапредување на употребата на специјални истражни техники.