На програмата на „Охридско Лето“, вечерва во Света Софија, со почеток од 21:00 часот, концерт на македонскиот виолинист Џафер Џафери кој заедно со Николас Алтстаедт – виолончело (Германија) и Хозе Галардо – пијано (Аргентина) ќе настапат со дела на Хајдн, Бетовен, Брамс. „Охридско Лето“ секое издание во програмата вклучува македонски уметници кои успешно делуваат надвор од државата.
„Во концепирањето на програмата на „Охридско Лето“ секогаш значаен сегмент има учеството на македонски уметници. Со посебно задоволство и чест свое место заземаат и македонските уметници кои успешно делуваат и надвор од Република Македонија кои градејќи ја својата кариера преставуваат вистински промотори на македонската култура. Во ова фестивалско издание, со големо задоволство, една концертна вечер ќе биде отстапена на еден од најуспешните македонски виолинисти Џафер Џафери кој години наназад успешно делува во Германија. Овој инзвореден виолинист ќе настапи со своите колеги уметници од светски ранг, Николас Алтстаедт и Хозе Галардо“, изјави селекторот на музичкиот дел од програмата Гордана Јосифова Неделковска.
Џафер Џафери почна да учи виолина во Македонија, а го продолжи образованието во европските земји, завршувајќи го Конзерваториумот „Петер Корнелиус“ во Мајнц кај, Е. Гега и продолжувајќи го студирањето во Фиренца на Сцуаола ди Мусица ди Фиесоле со Павел Верников и Хоцхсцхуле фüр Мусик унд Дарстелленде Кунст во Манхајм со Дора Брачкова. Добитник е на повеќе државни и меѓународни награди и грантови од фондациите за поддршка на млади таленти, вклучително право да свири на виолина од кремонскиот мајстор В. Панормо (1760). Настапувал како солист со оркестрите од Македонија, Германија и др. Како член на повеќе симфониски оркестри (ЦЕИ-Орцхестра, Њиенер Јеунессе Орцхестер, Классисцхе Пхилхармоние Бонн, Маннхеимер Пхилхармоникер, Деутсцхе Радио Пхилхармоние) учествувал на турнеите во Европа, Јужна Кореја и САД.
Николас Алстаедт е еден од најуспешните млади уметници на денешнината. Како последен студент на Борис Пергаменшчиков во Берлин, а потоа – на Еберхард Фелтц, тој се закити со бројни меѓународни награди и почна успешна кариера со забележителни проекти меѓу кои е изведбата на Шумановиот концерт со Виенската филхармонија под диригентство на Густаво Дудамел на фестивалот во Луцерн. Следеа концертите со ВВС оркестрите и други познати светски оркестри под диригентство на истакнатите уметници како сир Невил Маринер, Нееме Јарви, Владимир Федосеев и др. Алстаедт постојано соработува со најзначајните современи композитори како Ѓорѓ Куртаг, Јорг Видман, Мориц Егерт, Софија Губајдулина, Томас Адес и др. Тој е еден од малкуте европски уметници кој беше член на Здружението на камерната музика на Линколн центар во Њујорк во 2009-12 година. Неговите компакт дискови со концертите на Шуман и Хајдн, како и камерни дела, беа промовирани со голем успех.
Хозе Галардо ги започна своите часови по пијано на 5-годишната возраст на конзерваториумот во Буенос Ајрес, а продолжи на Универзитетот во Мајнц со Полди Милднер. По успесите на бројните меѓународни натпревари следеа повеќе турнеи и настапи на престижните фестивали, вклучително фестивалот на камерна музика во Локенхаус, фестивалите во Вербје, Луцерн и др. Како камерен музичар Галардо соработуваше со истакнатите уметници од Европа, Азија, Израел, Океанија, Јужна Америка меѓу кои Гидон Кремер, Џошуа Бел, Линус Рот, Барнаба Келемен и многу други. Галардо настапуваше во најдобрите светски сали – Берлинската Филхармонија, Тонхале – Цирих, Мусикхале – Хамбург, Театро дела Пергола – Фиренца, Санта Чечилија – Рим, Вигмор Хол – Лондон. Соработувал со познатите уметници на меѓународните мастер класи, и самиот предавал на Универзитетот во Мајнц и во Леополд Моцарт – Центарот во Аугсбург.