Скопјанец фатен како кради во повеќе хотели во Охрид

Поради постоење основи на сомнение дека е извршител на повеќе кражби, вчера СВР Охрид го приведе и од слобода го лиши Ш.Н.(66) од Скопје. Приведениот, кражбите ги сторил во периодот од јануари до мај оваа година во повеќе хотели во Охрид при што се стекнал со противправна имотна корист од околу 1500,оо евра.

Серијата кражби ги започнал во јануари оваа година во хотелот „Милениум“ каде извесно време го следел движењето на гостите по што искористил згодна прилика и одзел една ташна со околу 6500,оо денари, мобилен телефон „Самсунг-галакси“ и повеќе кредитни картички. При неговото следно доаѓање во Охрид, кај хотелот „Дончо“ забележал поголема група странски гости. Откако влегол во хотелот, извесно време го опсервирал нивното движење. Во момент кога еден од гостите оставил ташна на масата, Ш.Н. вешто ја одзел. Во ташната имало видео камера марка „Панасоник“ и неколку патни исправи. Тој, на сличен начин извршил кражба и во хотелот „Силекс“ каде влегол за време на доручек. Тука, забележал како една гостинка ја остава својата ташна на стол по што, разговарајќи на мобилен телефон, се приближил до ташната во која имало 400 евра, мобилен телефон, кредитни картици и лични документи и ја одзел сокривајќи ја под јакна што ја држел во рацете. На идентичен начин, сега притворениот кражба извршил во хотелот „Милениум“ каде, за време на доручек ја искористил раздвиженоста на гостите во ресторантскиот дел. Се фокусирал на ташна оставена на маса и искористил момент на оддалечување на сопственикот и ја одзел. Во ташната имало 700 евра, мобилен телефон „Нокиа“, фото апарат, кредитни картици и други документи.

Ш.Н. при секое доаѓање во Охрид со неговото патничко возило „Опел-Корса“ најнапред вршел обиколка по хотелите, а потоа се одлучувал каде ќе изврши кражби. Одземените предмети ги продавал на „Бит-пазар“, а патните исправи, документите и лични предмети ги фрлал во контејнер или по пат за Скопје.

Ш.Н. е приведен откако по обиколка низ охридските хотели го паркирал своето возило во близина на хотелот „Инекс Горица“. Против него, СВР Охрид ќе поднесе соодветна кривична пријава.