На седницата на Владата која се одржа деновиве се донесоа потребни одлуки со кои почнува процедурата за набавка на поливалентни вакцини за што државата ќе вложи 380 милиони денари. Вакцините треба да пристигнат во вториот квартал од идната година.
Ова го најави премиерот Никола Груевски, кој рече дека на седницата поминале повеќе точки од областа здравството за поголем број работи кои беа ветени во текот на изборите во нивната партиска програма и во владината програма што ја доставил до Собранието кое ја усвои.
„Процедурата за набавка трае околу една година и тие се дел од изборните ветувања. Ние го ветивме тоа на граѓаните и веднаш на правата владина седница вчера ги донесовме потребните одлуки. Вакцините ќе помогнат затоа што ќе се намали бројот на боцкање на деца до двегодишна возраст од 13 на седум“, посочи Груевски.
Премиерот нагласи дека ќе се намали бројот на ситни компликации кои се јавуваат некогаш при вакцинирањето, ќе се намали бројот на посети на лекар, односно земање и узурпирање на времето на лекарите кои можат за нешто друго да го искористат.
„Ќе биде од голема корист за сите. Тоа беше наше ветување и тоа го исполнуваме“, додаде премиерот Никола Груевски.