Дел од говорот на претседателот на СДСМ, Зоран Заев од Прилеп:
„Прилеп е градот на херојството во Македонија. Прилеп e градот којшто секогаш ја испраќал пораката на слободоумноста до цела Македонија. И еве денеска од овде, од Прилеп, нека се испрати пораката преку сите улици и маала, па преку Маркови кули до сите села и градови во Македонија. Нека се испрати пораката на Вистината за Македонија.
Добредојдовте прилепчани во долго очекуваната македонска пролет!
Велат дека Зоран Заев го урнисал безбедносниот систем на државата. Каков е тој безбедносен систем, почитувани граѓани, кадешто МВР е штаб на ВМРО-ДПМНЕ? Каков е тој безбедносен систем којшто штанца лични карти, повеќе од 100 илјади на број, само за избори? Зарем може да се уништи безбедносен систем којшто тие целосно го урнисале и дотолчиле?
Сашо Мијалков реагира, вели дека сум издал државна тајна, дека Зоран Заев издал државна тајна. Од кога тоа соопштувањето на криминалите на власта е државна тајна? И нели тој е началник на Управа за безбедност и контраразузнавање, па вели дека тоа било набавка на оружје, опрема и други инструменти за специјалните единици. Па специјалните единици се под Бирото за јавна безбедност, што тој бара да органзиира набавки, дотации, провизии за специјалните единици?
Како тоа Светлана Костова којашто во моментот на разговорите вели се јавувам од зградата на Управен суд во Карпош, судијка е во тоа време, како тоа таа има сертификат за државна безбедност!
Лаги со опашки почитувани пријатели. Донациите, ако се донации, се регистрираат на посебни сметки, ги води државата. Ниту ги имало во Буџетот регистрирано за 2012, ниту пак за 2011 година. Како е можно да се спомнуваат провизии па да има дилема дали во кеш или во банки? Апсолутно лаги со опашки, почитувани пријатели.
Велат дека Заев соработувал со странски служби, се изгубија во лагите. Може да ми стегнат уште една кривична пријава денеска оти сум во Прилеп, додека е пазарен ден. Па ќе кажат се пазари со странски служби Заев и ќе стегнат уште една кривична пријава. Но, нека стегаат кривични пријави крајот им дојде. Бегање нема. Готово е!
И ајде заедно драги пријатели да го дочекаме денот, но и да го најавиме времето коешто доаѓа. Времето коешто ќе ја воскресне и слободата, и демократијата, и правдата којашто ќе ја воскресне и вистината. Доаѓа времето на нова иднина на Република Македонија!“– истакна Заев.
Извор: www.sdsm.org.mk