Координаторот на Советничката група на СДСМ, Дамјан Манчевски, и коалициските партнери во Советот на Град Скопје, одржа прес-конфернција, на која истакна:
„Советничката група на СДСМ и опозицијата на денешната седница бара да се донесе одлука за директни преноси на седниците на Советот преку интернет. Со ова ќе се зголеми транспарентноста на работата на Советот, а граѓаните ќе имаат лесен начин да следат како градот ги носи одлуките кои се директно поврзани со нивните интереси.
Ова го бараме, особено имајќи предвид дека седниците на Советот упорно се закажуваат да почнуваат во 13:00 часот, со што вие претставниците на медиумите сте оневозможени до крај да ја следите работата на Советот.
Тоа е намерна тактика на Коце Трајановски. Секогаш како први на дневен ред се поставуваат банални теми, како на пример денешните први точки за прием на смукалки, брусилки и скали.
Додека во долниот дел на дневниот ред редовно се наоѓаат одлуките од најголемо значење за граѓаните на Скопје, кои најмногу негативно влијаат на квалитетот на животот на скопјани. Со тоа Коце Трајановски редовно ги крие од јавноста срамните одлуки кои ги носи владејачкото мнозинство во Советот.
За среќа во денешно време, од технички аспект е најлесно да се организира пренос преку интернет, а воедно овој начин е и најефтин.
Согласно нашите пресметки, градот во најлош случај би требал да издвои не повеќе од 10.000 евра за да се обезбедат сите технички услови за пренос на седниците во живо преку интернет.
Сметаме дека оваа наша иницијатива е во интерес на сите граѓани на Скопје, кои мораат да имаат можност да се информираат за работата на нивните претставници во Советот.
Секоја одлука која ќе значи одбивање на оваа наша иницијатива, ќе значи криење и нетранспарентност на работата на Коце Трајановски и градската власт.“- истакна Манчевски.
Извор: www.sdsm.org.mk