Трошоци на животот според класификацијата COICOP и цени на мало, април 2015

Според податоците на Државниот завод за статистика, индексот на трошоците на животот во април 2015 година, во однос на претходниот месец, изнесува 100.4, а индексот на цените на мало 99.9.

Порастот на индексот на трошоците на животот од 0.4% во април 2015 година, во споредба со претходниот месец, е резултат на повисоките индекси на свежиот зеленчук за 3.9%, свежото овошје за 1.3%, сувото овошје за 0.7%, другите печива и полутрајните колбасичарски производи за 0.4% и свежото млеко за 0.3%.

Исто така, пораст на индексот на трошоците на животот е забележан и кај поправките и одржувањето на опремата за сопствен превоз за 3.7%, информатичката опрема за 3.3%, болничките услуги за 3.2%, авионскиот превоз на патници за 2.6%, текстилот за домаќинствата за 2.3%, средствата за чистење и одржување на станот за 2.0%, другите лични предмети за 1.6%, велосипедите за 1.4%, средствата за лична хигиена за 1.3%, обувките за 1.1%, облеката и електричните апарати-големи за 0.7%, лековите и терапевтските помагала за 0.6%, накитот и часовниците за 0.5%, електричните апарати-мали, мотоциклите, опремата за прием, снимање и репродукција на звук и слики и исхраната во рестораните и хотелите за 0.4%, цврстите горива и течните горива и мазива за 0.2%.

Намалување на индексот на трошоците на животот во април 2015 година, во споредба со претходниот месец, е забележано кај другите неспомнати прехранбени производи за 1.7%, сувомеснатите производи за 0.6%, замрзнатиот зеленчук за 0.4% и тестенините за 0.3%.

Во април, исто така, намалување на индексите на трошоците на животот е забележано и кај гасот за домаќинствата за 9.1%, пакет-туристичките аранжмани за 6.6%, течните горива за домаќинствата за 2.8%, градини, цвеќиња за 1.7% и телефонските и факс апарати и услуги за 0.3%.

Индексот на трошоците на животот во април 2015 година, во споредба со април 2014 година, бележи пораст од 0.1%, а индексот на цените на мало бележи намалување од 0.9%.