Двајца албански државјани осомничени за кражба на дрва

Поради постоење основи на сомнение за сторено казнено дело „кражба на дрва“, полициската станица од Дебар поднесе кривична пријава против албанските државјани Л.Л.(23) и Х.Х.(19) двајцата од селото Требиште. Против нив полициската станица од Дебар поднесе и прекршочна пријава поради илегален премин на државната граница.

На 28 минатиот месец, пријавените биле затекнати на македонска територија во бесправна сеча на дабови, јаболкови и црешови дрва во шумски терен кај местото „Црвеница“ оддалечено на околу еден километар од границата.

Во 10 часот и 30 минути, полициските службеници ги затекнале двајцата пријавени по кратко време откако ја започнале неовластената сеча. Тие констатирале дека, пријавените со коњи нелегално ја преминале македонско-албанската државна граница, пресекле околу две метра просторни стебла кои веднаш потоа требало да ги товарат на коњите за транспорт преку нелегален премин. На местото на настанот повикана е увидна екипа од полициската станица во Дебар како и претставници од дебарската подружница на ЈП „Македонски шуми“. Веднаш известен е надлежниот Јавен обвинител а потоа извршен е увид и изготвен записник за направена штета.

Со пресуда од Основен суд-Дебар, на двајцата албански државјани одземени им се предметите и опремата и изречена им е мерка протерување во времетраење од две години.