Претседателот на СДСМ, Зоран Заев придружуван од заменик претседателката Радмила Шекеринска попладнето се сретна со германска делегација предводена од Михаел Рот, државен министер во МНР на Р.Германија, во којашто беше и амбасадорката на Р.Германија во Р.Македонија Кристине Алтхаузер.
Тема на состанокот беше актуелната политичка ситуација во Република Македонија.
Заеднички е ставот дека за излез од политичката криза и за иднината на Македонија се неопходни фер и регуларни избори, за што круцијална улога има исполнувањето на двата услова од пржинскиот Договор, прочистен Избирачки список и регулација на медиумите.
„Државната изборна комисија како независна институција чијашто обврска е Избирачкиот список треба да ги соопшти роковите за прочистување на списокот во којшто мора да имаат доверба сите политички субјекти во државата и граѓаните. Од голема важност за предизборниот и изборниот процес е да се обезбеди и објективно известување, бидејќи најголем дел од медиумите се под контрола на власта, поради што опозицијата нема фер шанса за медиумско претставување. СДСМ нема да отстапи од ставот за фер и регуларни избори со примена на европските вредности, а реализацијата на овие две обврски е меѓу нив“, рече претседателот Заев.
Претседателот Заев и заменик претседателката Шекеринска нагласија дека овој став на СДСМ го споделуваат и други политички субјекти во Македонија и целата демократска јавност кои се согласни дека фер избори на 24 април не се можни.
„Македонија на следните избори мора да добие Влада со полн легитимитет, а тоа е можно само на фер избори. Само така ќе се овозможи нормализација на институциите и стабилност на Република Македонија“, потенцираше претседателот Заев на средбата со државниот министер во МНР на Р.Германија, Михаел Рот.