Хуманитарен концерт на „Академија за солисти“ вечерва на Охридско лето

Вечерва, во рамки на програмата на „Охридско лето“ во црквата „Св. Софија“ во Охрид, концерт ќе одржи Државниот камерен оркестар „Академија за солисти”, со виолинистката Ајман Мусакајајева од Казахстан, а под диригентство на Хуан Карлос Ломонако од Мексико.

На програмата се дела на А. Вивалди/А. Пјацола, Г. Ф. Хендл.

Ајман Мусакајајева е еден од најзначајните претставници на виолинистичката школа на Казахстан. Постојано е активна на музичките сцени во светот, а на нејзиниот репертоар се наоѓаат дела од речиси сите епохи. Основач е на Државниот камерен оркестар „Солистичка академија“, со кој често настапува во Европа, Америка и Азија. Добитник е на повеќе награди на престижни интернационални натпревари, како и на повеќе признанија (People’s Artist, Honored Artist of the Republic of Uzbekistan, Artist for Peace од страна на УНЕСКО и други).

image1-1-200x300

Државниот камерен оркестар „Солистичка академија“ е водечки ансамбл во Казахстан. Основан е во 1991 година од страна на виолинистката Ајман Мусакајајева. Членовите на овој ансамбл се виртуози на својот инструмент, лауреати на повеќе интернационални натпревари, со одлична техничка подготвеност. „Солистичка академија“ е еден од најзначајните афирматори и промотори на казахстанската музика и традиција во светот.

download

Концертот ќе има хуманитарен карактер, а собраните средства од продажбата на билети ќе бидат наменети за настраданите од поплавите.