На симболичното пуштање во употреба присуствуваше и Бехиџудин Шехаби државниот секретар во Министерството за култура, кој нагласи дека со оваа последна инвестиција во симболот на градот се заокружува проектот за заштита на овој споменик на културата …
Со симболично вклучување на механизмот, кој неодамна беше инсталиран, во употреба се ставени четирите часовници на Саат кулата во Гостивар.
На симболичното пуштање во употреба присуствуваше и Бехиџудин Шехаби државниот секретар во Министерството за култура, кој нагласи дека со оваа последна инвестиција во симболот на градот се заокружува проектот за заштита на овој споменик на културата.
„Ставењето во функција на часовниците, одржувањето и осветлувањето на Саат кулата се еден од десетината проекти кои Министерството за култура ги финансираше во изминатиов период. Саат кулата сега е ставена во функција и како таква, освен историското значење сега ќе им биде од корист и на граѓаните. Овој проект е уште еден доказ дека се грижиме за културното наследство така што му ја враќаме убавината на градот. Отсега, очите на Гостиварчани пак ќе бидат насочени кон Саат кулата и преку овој часовник ќе ги навиваат и домашните часовници“, рече Шехапи.
Гостиварскиот градоначалник Невзат Бејта искажа задоволство од соработката при реализација на проектот и најави дека во скоро време низ градот, покрај овие часовници ќе бидат поставени уште четири на поважни локации.
Аднан Фејзулаи, директор на Конзерваторскиот центар од Гостивар, кој го реализираше овој проект нагласи дека механизмите кои фирмата изведувач ги постави, имаат и ГПС поддршка со што постојано ќе го покажуваат точното локално време.
За механизмот и ставањето во употреба на часовниците, Министерството за култура инвестираше 520 илјади денари.
Со реконструкцијата, овој културно исторски споменик од лани е ставен во функција и за туристички посети.
Саат-кулата важи за еден од најпрепознатливите објекти на Гостивар и како симбол на градот ја има на општинското знаме и на грбот. Записите говорат дека била изградена во 17 век.