Петар Рупески од охридски Варош, по вторпат во животот успеа да излезе од ладните езерски води со Светиот крст во рацете на прославата на празникот Богојавление – Водици во Охрид.
Во водите на Охридското Езеро крстот денес го фрли владиката Јосиф, митрополитот на Тетовско-гостиварската епархија.
– Пресреќен сум Го фаќам крстот по втор пат. Првиот пат тоа беше во 2005 година и навистина тогаш ми донесе многу среќа во животот. Посакувам секој да го фати крстот и да го доживее она што не можам да го опишам со зборови, изјави Рупески.
Денешната манифестација се одржа пред дваесеттина илјади верници. Од нив помеѓу 700 – 1.000 влегоа во водите на езерото, а покрај од Охрид „скокачи“ имаше и од Шпанија, Чешка, Бугарија, Србија и др.
Годинава, настанот во Охрид го проследија и бројни новинарски екипи од Македонија и од Србија, Хрватска, Албанија и Бугарија, што укажува дека оваа манифестација во градот под Самоиловата тврдина е една од најмасовните и најатрактивните во поширокиот регион.
Одбележувањето на овој голем православен празник со сите црковни обичаи започна со утринска света литургија во црквата „Света Богородица – Каменско“. По богослужбата, литијата низ чаршијата се упати кон градското пристаниште.
Во Охрид денеска, по традиција се служи топла ракија, но и вино, во пријатна атмосфера и со желби празникот да се слави уште многу години во добро здравје.
извор: Супер радио
