Денес, Агенцијата за промоција и поддршка на туризмот оддржа прес конференција на која објави дека имаме задоволството Македонија да биде домаќин на информативно патување за претставници на Магазинот „Motociclismo” едно од најстарите списанија за мотоциклизам во светот кое одбележува 100 годишен јубилеј со патување низ нашата земја. Република Македонија како земја домаќин ќе добие максимална видливост и шанса да достигне илјади посетители преку јасна порака на насловната страница на списанието и статија на најмалку 40 страници.
Ќе се сними и високo квалитетнo видео за промотивни цели кое ќе се прикажува на нивниот веб-канал и во текот на EICMA (меѓународерн саем за мотоциклизам во Милано, Италија со повеќе од 600.000 посетители годишно). “Motociclismo” е водечко списание за мотоциклизам во Италија со месечен тираж од 160.000 примероци. Нивната веб страна има над еден милион посетители месечно, Фејсбук страна со 270.000 следбеници, а на нивниот You tube канал гостуваат познати личности меѓу кој и шампионот во мотоциклизам Валентино Роси.
„Директорот на магазинот “Motociclismo”, Federico Aliverti ја предводи групата од дванаесет моторџии кои сметаат дека Македонија е погодна и атрактивна дестинација за мото- туризмот, а како што споменав Македонија ќе има доминантно место во наредните изданија на списанието со конккурентна мото-тура која очекуваме успешно да се пласира во Италија имајќи предвид дека италијанските туристички агенции се подготвени да ја вклучат во своите каталози. Воедно ќе биде препорачана програма за мото-тура во Македонија која ги опфаќа Скопје, Маврово, Охрид, Битола, Прилеп, Кавадарци, Струмица, Берово, Кратово и Куманово” изјави директорот на Агенцијата за промоција и поддршка на туризмот, Кристијан Џамбазовски.
Иницијативата за реализација на ова информативното патување е од Асоцијацијата на туристички агенции за дојдовен туризам (АТА ДМ), а истото беше поддржано од Агенцијата за промоција и поддршка на туризмот.
ЧЕСТИТ ЈУБИЛЕЈ !
Агенцијата за промоција и поддршка на туризмот континуирано работи на реализација на програмските активности за 2015 година. Резултатите од првиот квартал се позитивни и бројот на странски туристи во периодот јануари-март 2015 година, во однос на истиот период од претходната година е зголемен за 14%, додека бројот на ноќевањата е зголемен за 9.6%. Најголем број странски туристи во првите месеци од годинава имаме од Грција, Србија, Бугарија и Турција.
„Од почтетокот на годинава ги презентиравме туристичките потенцијали на петнаесет интернационални саеми за туризам каде учествуваа повеќе од дваесет и пет туристички агенции и тур оператори од Македонија, што е доказ дека квалитетот на понудата односно конкурентноста на туристичката понуда е зголемена.
„Продолжуваме со агресивна медиумска кампања, како и организација и реализација на студиски посети т.е. информативни патувања во Македонија при што можност да се запознаат со туристичките потенцијали на нашата земја имаа тур оператори од Америка, Русија, Шведска, Франција, и истите имаа бизнис состаноци со туристичкото стопанство од Македонија. Во повеќе Француски, Австралиски, Италијански магазини и списанија се објавија репортажи за Македонија како туристичка дестинација.“- рече Џамбазовски.
Согласно заклучоците од вонредната седница на советот за туризам при АППТ преземени се дополнителни мерки со засилено присуство на регионалните пазари преку организација на денови на македонски туризам во соседните земји како и организација на дополнителни информативни патувања за странски тур оператори и новинари.