На Клиниката за торакална и васкуларна хирургија е ставен во функција еден од најсовремените апарати за невромониторинг со кој ќе се сведат на минимум сите можни компликации кои се јавуваат при интервенции на тироидната жлезда. Станува збор за апарат кој првпат се набавува во Клиниката и во јавното здравство во Република Македонија, а ретко го има и во земјите од регионот. Вредноста на апаратот, кој го набави Министерството за здравство, е 2,1 милион денари.
Министерот за здравство Никола Тодоров денеска ја посети Клиниката каде по средбата со директорот Зоран Спировски и доктор Александра Кониг од Универзитетскиот медицински центар Хамбург-Епендорф, која работи со докторите, специјалистите на Клиниката, рече дека користејќи го апаратот тие ќе изведат 10 интервенции на тироидна жлезда.
Посочи дека овој апарат е од исклучителна помош за хирурзите за време на операцијата со цел да се сведат на минимум сите можни компликации кои се јавуваат при интервенции на тироидната жлезда, како што се повреда на гласните жици, која ако го нема овој апарат е многу честа и потоа треба да се прави втора дополнителна операција на друга Клиника за да се отстранат последиците.
„Со цел избегнување на овие компликации, по сугестија од Клиниката во Хамбург и по барање на нашите специјалисти и на директорот на Клиниката, Министерството го набави овој апарат. Се воведува еден нов пристап на ваков тип интервенции на Клиниката, што е за поздравување“, додаде Тодоров.
Директорот на Клиниката за торакална и васкуларна хирургија, Зоран Спировски рече дека со апаратот ќе се врши детекција на нервот, кој е одговорен за гласните жици, неговите гранчиња со кои како хирурзи доаѓаат во колизија при оперативни зафати на тироидната жлезда пред се на малигните заболувања на тироидната жлезда.
„Овој апарат покрај тоа што ќе најде широка примена кај нас, тој ќе може исто така да се користи и на Клиниката за оториноларингологија, на Клиниката за максилофацијална хирургија“, истакна Спировски.
Посочи дека тоа ќе биде една огромна придобивка за пациентите бидејќи ќе се сведат на минимум компликациите кои може да ги има при овие интервенции односно повредувањето на нервот одговорен за гласните жици по што понатаму произлегува еден проблем со говорот, се јавува дисфонија, пациентите не можат да зборуваат, а се јавуваат и тешкотии при дишењето…Нагласи дека верува оти сите тие можни компликации со помош на апаратот ќе ги сведат на минимум.
„Годишно на Клиниката се прават 200 до 230 операции на тироидната жлезда. Компликациите кои ги има после вакци интервенции зависат од стадиумот на заболувањето на малигната болест на штитната жлезда. Ние не заостануваме од оној среден процент на компликации кои се својствени за големи болници и се од 5 до 10 отсто. Сега се надевам дека драстично ќе го намалиме и овој процент“, рече Спировски.
Појасни дека апаратот е поврзан со тубата која се става во душникот и преку која се дава анестезија на болниот. Таа туба, истакна, е специјална со специјална електроника која се поврзува со инструмент кој ние директно во оперативното поле го користиме.
„Како се приближуваме до нервот се слуша звук на апаратот и се појавуваат амплитуди. Значи апаратот има и дисплеј на кој се гледа функцијата на нервот и имаме еден звучен сигнал кој не опоменува дека сме во близина на нервот, така што можеме брзо да реагираме. Тоа се се документира и во случај ако дојде до некаков спор или некаква нејасна ситуација ние имаме документ кој директно од дисплејот се снима и се печати, така што сето тоа стои во историјата на болеста на болниот“, додаде Спировски.
Доктор Александра Кониг од Универзитетски медицински центар Хамбург-Епендорф, која е специјалист за оперирање на тироидна жлезда, истакна дека годишно извршуваат околу 300 операции на тироидата и користат нов метод на невромониторирање.
Посочи дека станува збор за многу добар метод и веќе е прифатен како стандард во Германија, за да се зачува нервот. Методата, нагласи, е одлична за пациентот, но и многу полезна за хирургот, кој може да види за време на операцијата, што се случува со нервот.
„Доколку немате воведено невромониторирање, не знаете каква е состојбата со нервот и не можете да ја смените вашата стратегија за време на операцијата. Ова е многу важно и за квалитетот на животот на самиот пациент. Многу ми е драго што сум тука, се сретнав со многу добар тим лекари и можам да кажам дека имате одлични услови за работа тука“, додаде Кониг.