Претседател на ВМРО-ДПМНЕ, Никола Груевски до сите граѓани упатува честитка по повод празникот 11 Октомври – Денот на народното востание .
Почитувани граѓани на Република Македонија,
Mи претставува особена чест и задоволство од името на ВМРО-ДПМНЕ и од мое лично име да Ви го честитам 11-ти Октомври – Денот на Народното Востание.
Денес, Република Македонија ја слави Народноослободителната борба и нејзиното значење во остварувањето на вековниот сон на нашите предци за сопствена државност. 11-ти Октомври e историскиот континуитет на вековната идеја на нашиот народ за борба за слободна и самостојна Република Македонија. Оддавајќи почит на партизаните од Народноослободителната борба, оддаваме почит и кон сите наши предци кои со своето дело покажаа како се бори, како се сака и како посветено се работи за Македонија.
Празниците како денешниот се одлична можност да се потсетиме на минатото, но и да погледнеме кон иднината. Наша заедничка цел е подобра и поуспешна Република Македонија, и токму затоа е потребно обединети да продолжиме да чекориме кон оваа цел. Со заеднички сили и напори, со заедничка работа и посветеност да покажеме дека заедно можеме да извојуваме нови победи за нашата држава. Нови победи за успешна и просперитетна Република Македонија. Наша заедничка цел е силна Македонија!
Нека ни е честит и вековит државниот празник 11-ти Октомври! Нека ни е успешна и вечна Татковината!
Да живее Република Македонија!“– стои во честитката.