Проектот за имплементација на Конвенцијата за правата на детето во Република Македонија, во Охрид се спроведува во основното училиште ”Братство Единство” и во Средното Општинско Стручно Училиште ”Свети Кирил и Методиј”, под покровителство на Швајцарската фондација ”Pestalozzi”, Коалицијата на младински организации ”СЕГА”, од Прилеп и Младински Совет Охрид.
Оваа година во двете училишта во Охрид во кои се работи проектот беа избрани нови деца правобранители, и тоа: во основното училиште “Братство Единство” избрани се тројца правобранители во паралелките на Македонски, на Албански и на Турски јазик, нивни заменици, а додека пак во С.О.С.У “Свети Кирил и Методиј”, беа избрани едно дете правобранител и двајца заменици.
Во периодот Септември – Октомври 2016 година, откако беше извршен нивниот избор, децата правобранители учествуваа и на изборите на ученички заедници во нивните училишта, како и во подготовките за реализација на малите проектни грантови кои кои Коалицијата “СЕГА” им ги доделува на двете училишта.
Исто така, во текот на месец Октомври тие учествуваа и на дводневна обука за деца правобранители во Струга, каде што обучувач беше и заменичката народен правобранител, госпоѓата Васка Бајрамовска – Мустафа, и каде што имаа можност да се запознаат и со нивни соученици од други училишта и градови и да стекнат нови искуства и знаења.
Во рамки на своите активности, во текот на месец Ноември, тие имаа задача да спроведат по две работилници за креирање годишна програма на училиштата и за дебата, активизам и истражување. Меѓу другото, во двете образовн институции беа организирани и презентации на моделот дете правобранител, на кои учествуваа вкупно 77 ученици.
Активностите на децата правобранители продолжуваат, до крајот на учебната 2016/2017 година.