Министрите за надворешни работи на НАТО одлучија да ја поканат Црна Гора да ги започне преговорите за да стане 29. земја-членка на Северноатлантската алијанса.
„Ова е добар ден за Црна Гора, добар ден за Западен Балкан и добар ден за Алијансата“, истакна генералниот секретар на НАТО, Јенс Столтенберг, кој ја оцени оваа одлука како историска на патот кон остварувањето на НАТО визијата за целосна, слободна и мирна Европа.
Оваа одлука за проширување, прв пат после шест години, е донесена благодарение на непоколебливата посветеност на Црна Гора кон заедничките вредности и меѓународната безбедност. Истовремено, важно за оваа земја е да продолжи на реформскиот пат.
Откако ќе се заклучат преговорите, сојузниците ќе потпишат протокол за пристапување, кој ќе мора да биде ратификуван од парламентите на сите 28 земји-членки. Кога процесот ќе биде завршен, Црна Гора ќе може да пристапи кон Договорот од Вашингтон и да стане членка на меѓународнa безбедносна организација.
Што се однесува на Република Македонија, НАТО и понатаму останува на ставот од Букурешт уште од 2008 година, односно дека нашата земја ќе добие покана веднаш откако ќе го реши спорот со името со Република Грција.