Попривлечно стручно образование, кое ќе промовира деловна успешност, конкурентност и иновации, понуда на разновидни и флексибилни можности за учење на младите и возрасните, со кои ќе стекнат вештини за кариерен развој и претприемачки дух, и зголемување на социјалната вклученост, вработливоста и мобилноста. Тоа се главни цели на Нацрт националната стратегија за стручно образование и обука во контекст на доживотно учење 2013-2020.
Документот беше промовиран денеска на јавна расправа во средното фискултурно училиште „Методи Митевски-Брицо“. Креиран е од домашни и меѓународни експерти, преку анализа на мислењата на ученици, работодавци, локална самоуправа, стручни и државни институции, невладин сектор. Нацрт-стратегијата произлезе од соработката помеѓу Министерството за образование и наука и Европската тренинг фондација (ЕТФ) од Торино, која и ја финансира.
Зоран Велковски од Филозофскиот факултет рече дека се работи за сериозен документ кој треба да го подобри стручното образование и обука во Македонија што, пак, ќе го реши проблемот на долгорочната невработеност и големиот број лица без квалификации (41,67 отсто) и лица со застарени квалификации.
„Изготвен е акциски план од 2013 до 2020 година. Предвидени се голем број цели, мерки и активности кои треба да се реализираат. Проблематично во функционирањето на системот на стручно образование и обука кај нас е атрактивноста, релевантноста на наставните планови и програми, оспособеноста на младите и возрасните да се пласираат на пазарот на труд, системите на оценување, следење и мониторирање на процесот, осигурување на квалитетот, управувањето. Сите клучни точки кои бараат подобрување и осовременување се составен дел на стратегијата….како и неформалниот систем на стручно образование, кој предвидува зголемување на капацитетите на институциите за реализација на програмите од постсредно стручно образование, обуки за вештини и квалификации, решение за 41 процент од населението кое е без квалификации, што е сериозен проблем за државата“, изјави Велковски.
Министерот за образование и наука Панче Кралев истакна дека документот е значаен зашто компаниите бараат стручност и квалитет на кадарот што излегува од средните стручни училишта.
„Со донесувањето и понатаму со спроведувањето на стратегијата ќе овозможиме квалитетно средно стручно образование кое, пред се, ќе биде атрактивно за учениците, но исто така ќе овозможи да се добива кадар според потребите на бизнис-секторот. На крајот, ќе овозможиме и поконкурентна економија“, рече Кралев.
И Европската стратегија 2020 е насочена кон стручната квалификација и кон лицата на кои им се потребни вештини според барањата на пазарот на трудот. – Живееме во глобализиран свет во кој преживувањето се повеќе зависи од образованието и обуката. Прашањето е какво образование и каква обука, рече Манфред Воленборн, претставник на ЕТФ.