Еколошка акција за спас на шумскиот појас во стариот дел од градот, денес организираше Еколошкото друштво „Грашница“. Од ЕД Грашница велат дека голем број борови и бадемови стебла од шумата помеѓу Самоиловите Тврдини и Плаошник се нападнати од инвазивното растение бршлен, и дека бршленот буквално ги цица и загушува дрвјата и претстои опасност шумата да се исуши.
„Бршленот се одвива околу стеблата на дрвјата, ја зголемува нивната тежина и при поголеми ветрови или при снег стануваат доста кршливи, бидејќи при поголема тежина тие се ранливи на други влијанија и значи има можност шумата постепено да се деградира“. – изјави Ѓоко Зороски од Еколошкото друштво Грашница Охрид.
Акцијата беше насочена кон физичко отстранување на бршленот, бидејќи како што рече Зороски бршленот е доста упорно растение кое што бара физички да се отстранува.
„Целта на акцијава ни е да привлечеме што поголемо внимание, бидејќи не е само шумата од стариот дел на градот нападната, туку патот кој води до градот Охрид“. – додаде Зороски.
Акцијата се организира заедно со Одделението за заштита на животна средина од општина Охрид, здруженијата „Синан Челеби“ и „Св. Кирил и Методиј“ од Охрид како и со поддршка на студенти од Факултетот за туризам.
WebOhrid
