“МВР, меѓу другото, најголемо внимание посветува на превентивната активност, притоа постојано застапувајќи го ставот дека тие активности во насока на превенирање мора да бидат системски во спрега на иснтитуциите и вонинституционалните организации. Практично сите фактори чие влијание и улога се исклучително важни во сферата на безбедноста на сообраќајот треба заеднички, синхронизирано, да се стремат кон посеопфатен настап“, истакна меѓ другото министерката за внатрешни работи м-р Гордана Јанкулоска во своето обраќање на трибината што во организација на Републичкиот совет за безбедност на сообраќајот на патиштат се одржа денес во Скопје а по повод 17 Ноември Светскиот ден за одбележување и сеќавање на жртвите од сообраќајни несреќи.
На трибината тематски посветена на прашањето – “Како до помалку сообраќајни несреќи со фатални последици“, во своето излагање министерката Јанкулоска посочи дека Безбедноста во сообраќајот веќе од поодмна не е само прашање на почитување на законската регулатива или пак на стручно опсервирање на квалитетот на сообраќајната инфратруктура, туку без дилема – приоритетна тема од поширок јавен, односно општествен интерес.
“Причината е едноставна и навистина сериозна- само во текот на деветте месеци од оваа година , значи заклучно до крајот на септември, ние имаме евидентирано 3.140 сообраќајки со настрадани лица, што споредбено со истиот период лани е зголемување за 2.3 проценти. Но што е уште поважно и пострашно е фактот дека во незгодите настрадале 4831 лице (лани таа бројка изнесувала 4569 лица) а во тие сообраќајки загинале 140 лица или за 40 проценти повеќе од 2012 година“, нагласи Јанкулоска.
Исто така Јанкулоска потенцирајќи дека животот не е статистичка категорија туку нешто бесценето, истакна дека безбедноста во сообраќајот треба и мора да се третира не само како стручна ами и како сериозна општествена проблематика.