Премиерот на Република Македонија, Никола Груевски упати честитика до православните верници, до поглаварот на Македонската Православна Црква – Охридска Архиепископија Архиепископ Охридски и Македонски Г.Г. Стефан по повод Рождеството Христово-Божик.
„Ваше Блаженство,
На овој значаен ден, со голема радост од мое лично име и од име на Владата на Република Македонија, Вам, на членовите на Синодот, на ценетото свештенство и монаштво, како и на сите православни верници од Македонија и дијаспората, Ви го честитам големиот христијански празник – Божиќ.
Христовото раѓање и симболиката на Божиќ е една од најсилните поткрепи на секој верник. Овој ден не потсетува дека Бог во својата намера да го доближи човекот до себе, одлучи и Самиот Тој да постане човек и да ги превземе врз себе сите слабости и гревови на човечковата природа. Токму затоа, Божиќ е најубавиот и најрадосниот христијански празник. Да одбележиме, но и да се потрудиме да вратиме со добри дела, со чиста мисла, со љубов, толеранција и трпение. Да го празнуваме заедништвото со Бога и да се помолиме и во иднина Бог да биде со нас во сите потешкотии за да ги надминеме, во секоја тага за да ја пребродиме и во секоја радост да ја удвоиме.
Како денес така и засекогаш, нашите срца и домови нека бидат отворени за нашиот Бог, за сета добрина и милостина, нека од нив блика светлина која ќе ја рашири божиќната магија од милосрдие и радости. Нашите молитви нека донесат многу здравје, успех и благосостојба на сите верници во Република Македонија и секаде во македонската дијаспора.
Нека Бог донесе мир и љубов во сечие срце !
Нека неговата мудрост ни донесе благосостојба и многуброен пород !
Нека е за многу години големиот христијански празник – Божиќ!ХРИСТОС СЕ РОДИ!“- стои во честитката.