Министерот за труд и социјална политика Диме Спасов и министерот за труд и социјални работи на Чешката Република Микаела Марксова во Прага потпишаа Меморандум за соработка од областа на трудот, вработувањето и социјалната политика.
Република Македонија и Чешката Република имаат заеднички изразен интерес за развивање на соработката и пријателските односи. Токму поради тоа со потпишувањето на Mеморандумот се предвидува активна соработка на двете министерства во делот на грижа за лица од ранливите групи, социјални услуги, социјално осигурување, социјални бенефиции, Законот за работни односи, политики за пазарот на труд и вработување, социјален дијалог и колективно договарање.
Исто така, во иднина со склучениот Меморандум се предвидува и започнување на заеднички проекти, организирање конференции, семинари, студиски посети.
Овој тип на размена на искуства и продлабочување на соработката со земјите членки на Европската Унија, го помага евроинтегративниот процес на Република Македонија.