Мандолинскиот оркестар на Младинскиот културен центар од Скопје под диригентската палка на Ванчо Јовчев со успех учествуваше на 2. Меѓународен фестивал за хорови и оркестри “Wien Music Festival” што од 11 до 14 септември се одржа во Виена, Австрија.
Нашите инструменталисти од неколку генерации одржаа два концерта, од кои едниот во катедралата во центарот на Виена, а другиот во салата на Конзерваториумот за драмски и музички уметности во Виена. На програмата беа изведени дела од Бах, Шуберт, Вилијамс, Шостакович,… како и неизбежното „Македонско капричо“ од Драган Шуплевски.
Посебен куриозитет беа и блескавите изведби како солист во делата на Вилијамс (темата од филмот „Шиндлеровата листа“) и на Шуплевски на нашиот млад, но веќе докажан виртуоз на виолината, Ева Богоевска. На концертот присуствуваше и македонската амбасадорка во Австрија, госпоѓа Василка Попоска Треневска.
И второто издание на фестивалот имаше ревијален карактер. На него годинава учествуваа ансамбли и хорови од Полска, Финска, Чешка, Норвешка, САД, Словенија, Италија и Македонија. Освен од публиката, за нашите музички уметници, особено драгоцени беа и аплаузите што на секој чекор ги добиваа од другите фестивалски учесници кои не го криеја воодушевувањето од квалитетот во изведбата на македонските колеги.
Учеството на Мандолинскиот оркестар на 2. Музички фестивал во Виена, Австрија се реализираше со поддршка од Министерството за култура на Република Македонија и Град Скопје.