Денес во основното училиште „Христо Узунов“ пристигна Бадникова пештера од манастирот „Свети Јован Бигорски“ изработена од вештите раце од монахињите при манастирот „Св. Георги“ – Рајчица. Пештерата беше пречекана од учениците, наставниците и директорот на училиштето Тони Симоновски, пеејќи ја песната „Вечниот Бог“ преку која ја пренесоа пораката дека Христос се роди заради нас, за да донесе мир на земјата и меѓу луѓето добра волја.
Директорот Симоновски изјави благодарност до манастирот „Свети Јован Бигорски“, односно до вредните раце на монахињите и монасите и до организаторите на Бадниковата поворка. Пештерата ќе го краси училиштето и ќе поттикне понатамошна соработка со организаторите за слични настани.
Освен тоа, учениците покажаа голема заинтересираност за посета на бигорскиот манастир која ќе се оствари на пролет.