Денеска, Министерот за внатрешни работи Оливер Спасовски се сретна со Хојт Брајан Ји, заменик помошник на државниот секретар на САД. На средбата двајцата соговорници разговараа за политичката криза во Република Македонија и проблемот со мигрантите, а министерот Спасовски се заблагодари за поддршката што Република Македонија ја добива од САД во решавањето на овие проблеми.
Министерот Спасовски ја потенцираше и злоупотребата на етничките и верските симболи што се случува деновиве и може да има не само негативни политички и безбедносни импликации, туку и да ги поткопа процесите за фер, слободни и демократски избори. Сите субјекти треба да се воздржат од креирање на вештачки сценарија со кои се добиваат ефтини политички поени на сметка на безбедноста и сигурноста на граѓаните, истакна министерот Спасовски.
Двајцата соговорници се согласија дека политичката криза во Република Македонија може да се реши само со фер, демократски и кредибилни избори, а сите политички фактори треба да ја поддржат работата на институциите.
Воедно, беше разговарано и за миграциската криза, активностите и операциите кои се преземаат за справување со неа.