Повеќе од 7000 наставници од јавните средни училишта во земјата се опфатени со обука за подобрување на квалитетот на интерактивната настава, која започна вчера и ќе се реализира до крајот на јуни.
Обуката е дел од проектот „Современи методи и техники на настава“ и има теоретски дел и поддршка во самата настава со практични примери, за да се поттикне креативноста на наставниците и учениците, да се развие критичкото мислење кај учениците и да се создадат предуслови за поголемо користење на дигиталните содржини.
На првиот ден од обуката, заменик-министерот за образование и наука Спиро Ристовски и директорката на Бирото за развој на образованието Весна Хорватовиќ, го посетија СУГС „Васил Антевски-Дрен“. Ристовски истакна дека се работи за еден од исклучително значајните проекти и процеси кои министерството и бирото ги спроведуваат годинава, со поддршка на “University College London“ кој на Шангајската листа е рангиран во топ 20-те во светот.
„Универзитетот во Лондон во првата фаза од овој процес изврши комплетна обука за зголемување на компетенциите, вештините и полесна имплементација на процесот на интерактивна настава кај советниците во Бирото, кои беа обучени да бидат мастер-тренери. Сега таа обука, советниците ја пренесуваат на сите наставници во средните училишта во Македонија“, рече Ристовски, додавајќи дека овој проект е корисен за наставниците, а дека најголем бенефит ќе имаат учениците.
Директорката на Бирото Весна Хорватовиќ рече дека наставниците ќе добијат сертификат кој е признат од Бирото за развој на образованието и од “University College London“ и дека тоа ќе им помогне во нивниот професионален и кариерен развој.
Инаку, обуката се состои од осумчасовна теоретска обука и осумчасовна поддршка во самите училишта од страна на советниците.