Владината Агенција за промоција и поддршка на туризмот на Република Македонија (АППТ), предводена од Директорот Лела Крстевска, во Охрид оствари средба со топ менаџментот на ТУИ.
На средбата се разговараше на повеќе теми од областа на туризмот меѓу кои и досегашните искуства кои произлегуваат од успешната соработка со овој голем меѓународен туроператор, нови можни чекори и услови за дополнителна соработка на полето на организиран туристички промет, како и инвестициски можности во туризмот, а сето тоа во правец на подобрување на квалитетен туризам и унапредување на туризмот во Македонија. За време на средбата се дискутираше и за проширување на туристичката понуда на холандскиот пазар со нови атракции.
„Ние бележиме 20% пораст за првиот квартал во однос на холандски гости и 30 % пораст во однос на посети и 20 % во однос на ноќевања. Ова се брјките за првиот квартал од годинава, а се надеваме дека и во вториот квартал ке оствариме некаков пораст”, вели Лела Крстевска, Директор на Агенцијата за промоција и поддршка на туризмот.
Македонија е атрактивна дестинација за холанѓаните, но според ТУИ сеуште недоволно откриен скапоцен камен, за чие откривање соработката со Агенцијата за промоција и поддршка на туризмот е од огромно значење.
На работната вечера во Охрид, како дел од делегацијата на ТУИ предводена од извршниот Директор на ТУИ, присуствуваа и Директорот на Националното туристичко здружение на Холандија, Директорот на гаранцискиот фонд за патувања, Директорот на ТУИ за Холандија, како и претставници на холандските медиуми, а на покана на Агенцијата за туризам, присутни беа и претставници на Хотелската Асоцијација на Македонија (ХОТАМ) кои доделија благодарница за соработката на ТУИ.
Годинава, очекувањата за бројот на туристи од Холандија се оптимистички, вели Жак Крејнен, продукт менаџер на ТУИ Холандија, одговорен за Македонија, и додава дека покрај културата и пријателството, вкусот, природа, можностите за спорт, возење велосипед, планинарење и параглајдинг, сето тоа ја прави оваа земја посебна со можност за развој и на семеен туризам.
На прашања на новинари за мигрантската криза и можното негативно влијание врз бројот на туристи од Холандија, Аријан Керс, генерален менаџер на ТУИ Холандија, со дециден одговор „Луѓето кои се веќе на одмор тука сфатија дека имаат одмор без да се вклучени во никаков вид на проблеми. Тоа е секако позитивен имиџ за земјата. Направивме една интензивна маркетинг кампања која позитивно влијаеше на луѓето да сфатат дека ситуацијата не е критична, а ние со фактот што сме тука, веќе се уверивме во тоа. Сите наши позитивни искуства ќе ги претставиме како на нашите клиенти-туристи, така и пред холандските туристички агенции“ – изјави Керс.
Во моментов во Охрид (23-28 Мај), за прв пат се одржува и годинешниот конгрес на 70 најдобри млади туристички работници (студенти на факултетите за туризам во Холандија, кој во организација на училиштата за туризам, Сојузот на тур-оператори, Аеродромот Схипхол и ТУИ- Холандија).
За овој конгрес, Република Македонија е избрана од пет земји кои влегоа во потесен избор, што е своевидно признание на квалитетот на туристичката понуда и напорите кои Владата на Република Македонија ги вложува континуирано со цел подобрување на квалитетот на услугите, стандардите и севкупната понуда на туризмот.
Студентите во Македонија снимаат промотивен материјал за развој на Охрид како дестинација. Тие соработуваат со нашите студенти по туризам така што се надеваме дека оваа размена на искуства ќе придонесе за подобра презентација на Охрид кај идните тур-оператори, но ќе им помогне и на нашите студенти да ги осознаат убавините на туризмот како професија, изјави Лела Крстевска, Директор на Агенцијата за промоција и поддршка на туризмот на Република Македонија, додавајќи дека избраниот материјал изработен од студентите, ќе биде дел од интернет страницата на Агенцијата за промоција и поддршка на туризмот, а тројцата најдобри студенти ќе имаат можност да дојдат повторно во Македонија и да дадат придонес за развојот на туристичката понуда.
Сезоната за 2016 година се отвори на 3-ти Мај, кога пристигнаа 180 туристи од Холандија. Ова е 6-та година со организиран туристички превоз, со фрекфенција 2 до 3 пати неделно, од мај до октомври, како пристигнуваат туристи од Холандија, а очекувањата се дека годинава ќе се надмине бројот од 30 000 посети на холандски туристи.
Бројот на холандски туристи и оваа година бележи позитивен тренд, при што, бројот на туристи е зголемен за 30%, а бројот на ноќевања за 20%.
Агенцијата за туризам и оваа година продолжува со позитивна туристичка промоција и грижа за чинителите во туризмот.
