Претседателот на Република Македонија, д-р Ѓорге Иванов, денеска се потпиша во книгата на жалост, отворена во Амбасадата на Словачката Република, по повод смртта на првиот претседател на Словачката Република, Михал Ковач.
Претседателот Иванов изрази жалење за смртта на претседателот Ковач и го истакна неговиот придонес за демократизацијата на Словачката Република и нејзините европски и евроатлантски интеграции.
„Благодарение на неговите заложби, Словачката Република денес е значајна и почитувана земја-членка на Европската Унија и НАТО. Токму во негово време, Република Македонија и Словачката Република воспоставија дипломатски односи, кои се надоврзуваат на длабоките корени на македонско-словачкото пријателство”, напиша претседателот Иванов во книгата на жалост.
Михал Ковач беше првиот демократски избран претседател на независната Словачка Република, кој својот мандат го извршуваше од 1993 – 1998 година и воедно беше еден од основачите на Движењето за демократска Словачка.