Министерството за внатрешни работи беспрекорно ги заврши своите обврски и задачи, со што Република Македонија ги имаше најмирните и најдемократските избори во нејзината историја откако функционира повеќепартискиот систем.
Ова е констатација на Оперативниот штаб на Министерството за внатрешни работи задолжен за постапување по Претседателските и предвремените парламентарни избори 2014 година, по одржувањето на последниот состанок на распуштањето.
На овие избори првпат Министерството се одлучи за патролно покривање, односно поголема мобилност на избирачките места, наместо досегашната пракса на фиксно, односно стражарно покривање и постапување.
„Исходот од реализацијата на претходно изготвените планови беа избори во кои граѓаните можеа најдемократски, по сопствена воља, без никакви притисоци, зад параваните да го дадат својот глас за политичката опција за која сметаат дека им нуди попросперитетна иднина. Првпат во сите досегашни изборни циклуси не е регистриран ниту еден прекин на гласањето, ниту се регистрирани нарушувања на јавниот ред и мир на самите избирачки места“, стои во соопштението од МВР.
Во кампањата и во двата круга на Претседателските избори, како и гласањето на предвремените Парламентарни избори, според Оперативниот штаб е постапувано единствено по пријави кои не влијаеја на самиот процес на гласање на избирачките места. По преземени мерки, како што информираат, МВР поднесе шест кривични пријави против шест сторители за сторени шест кривични дела од кои „повреда на слободата на определување на избирачите“ – две дела и по едно дело „повреда на тајноста на гласањето“, „злоупотреба на избирачко право“, „спречување на избори и гласање“ и „напад на овластено службено лице при вршење на работи на безбедноста“.
Покрај ова, на девет лица МВР им издаде девет платни налози за сторени пет прекршоци од кои „учество, предизвикување или поттикнување тепачка“ три и по еден прекршок „физички напад“ и „оддавање на пијанство“.
Секторот за внатрешна контрола и професионални стандарди поднесе извештај за поведување постапка за утврдување дисциплинска одговорност против полициски службеник од Полициската станица – Крива Паланка, кој на денот на изборите, постапуваше спротивно на задачите наведени во наредбата за вонредно обезбедување избирачко место во ОУ „Христијан Тодоровски Карпош“ во село Отошница, Крива Паланка
За потребите на изборниот процес беше спроведена обука за 7.000 полициски службеници кои го дадоа својот придонес во реализирањето на обврските на Министерството. Над 4.100 полициски службеници беа ангажирани за обезбедувањето на вкупно 580 митинзи и средби со граѓани на кои кандидатите за претседател и за пратеници можеа да ја изложат својата програма. На овие митинзи според проценките присуствуваа 530.000 граѓани и тие минаа без ниту еден посериозен инцидент.