Министри за култура и нивни заменици од регионот кои денес во Охрид ќе учествуваат на министерската конференција на Советот на министри за култура на Југоисточна Европа вчера ја посетија Општина Вевчани.
Високите гости беа пречекани со традиционална нафора, домашни колбаси и со вевчанските зурли и тапани, а нивни домаќини беа заменик-министерот за култура на Република Македонија Драган Недељковиќ, како и градоначалникот Цветомир Угриноски кој истакна дека Вевчани има непроценливо културно-историско богатство кое вреди да се посети.
Министрите за култура на Србија, Албанија, Босна и Херцеговина, Хрватска и Молдавија, Иван Тасовац, Мирела Кумбаро, Средоје Новиќ Анреа Златар-Виолиќ и Моника Бабуч, како и заменик-министерот за култура на Бугарија Васил Василев, ги посетија и познатите Вевчански Извори.
Во текот на денешниот ден, тие ќе учествуваат и на министерската конференција во Охрид што ќе ја отворат министерката за култура на Република Македонија Елизабета Канческа-Милевска, како и генералната директорка на УНЕСКО Ирина Бокова.
Овој значаен настан претставува прва регионална министерска средба која што го потврдува спојувањето на платформата на Советот на министри за култура на Југоисточна Европа со платформата за регионална соработка на УНЕСКО во областа на културното наследство.
