30 дена притвор за екс-градоначалникот на општина Охрид Петрески

Поранешниот градоначалник на општина Охрид, Александар Петрески заработи 30 дневен притвор.

Исто толку во притвор ќе бидат тројцата негови блиски соработници, поранешните раководители на секторите за сообраќај, комунални дејности и туризам.

Според обезбедените докази, оваа криминална група била предводена од првоосомничениот, кој во својство на одговорно лице – Градоначалник на Општина Охрид во периодот од 2007 до месец март 2013 година формирал злосторничко здружение во кое вклучил лице вработено во општината со Договор за дело од 2006 до 2009 година како негов советник, а од 2009 во својство на раководител на Одделението за сообраќај и патишта, потоа Раководител на Одделение за комунални дејности, Раководител на Сектор за туризам и локален економски развој. Истите создале организирана криминална група во која се вклучени како членови и тројца сопственици и управители на правни лица, со цел вршење на кривични дела при спроведувања на постапки за јавни набавки спротивно на законските прописи со привилегирање и во корист на повеќе правни и физички лица блиски на криминалната група.

Криминалната група, во период од 2007 до 2013 година со незаконитото постапување, го оштетиле Буџетот на Општина Охрид во износ од вкупно 47.869.817,00 денари, а се стекнале со противправна имотна корист од 148.684.616,00 денари од спорните јавни набавки. Во тие средства се вклучени 2.284.641,00 денари, лична корист на првопријавениот, а при тоа извршување на кривичното дело перење пари легализирале и противправна имотна корист во вкупен износ од 15.892.700,00 денари. Покрај ова, првоосомничениот се товари и дека побарал и примил поткуп во вкупен износ од од 734.641,00 денари исплатен од две лица.

Извор: Нет Прес