Претседателот на Република Македонија, д-р Ѓорге Иванов, од 26 до 28 јануари ќе престојува во работна посета на Италијанската Република каде што ќе учествува на 7.Состанок на високо ниво во организација на Меѓународниот центар „Низами Ганџави” и Италијанското друштво за меѓународни организации – Иницијатива за глобален дијалог во мултиполарен свет, што се одржува во Рим.
На состанокот кој ќе се одржи во Италијанскиот сенат, претседателот Иванов ќе се обрати на воведната сесија насловена „Одговор на радикализацијата и екстремизмот преку меѓурелигиски дијалог”.
За време на работната посета на Италијанската Република, предвидено е претседателот Иванов да оствaри повеќе средби со учесници на Конференцијата. Учеството на македонскиот претседател на овие состаноци е резултат на неговата посветеност во остварувањето на целите на Алијансата на цивилизациите на Обединетите нации, како и на одличната соработка со Меѓународниот центар „Низами Ганџави” и Италијанското друштво за меѓународни организации – Иницијатива за глобален дијалог во мултиполарен свет. Претходно, претседателот Иванов има учествувано на состаноците во Баку, Софија и во Рим.