Претседателот на Република Македонија, д-р Ѓорге Иванов, утре ќе учествува на „Самит за поддршка на Сирија и регионот” што се одржува во Лондон, Обединетото Кралство на Велика Британија и Северна Ирска, каде што ќе има и свое обраќање.
Целта на самитот на шефови на држави и Влади е создавање фондови и обезбедување помош од меѓународната заедница за обновување на Сирија, како и поддршка на државите кои се особено погодени од бранот на бегалци и се крајна цел на бегалците. Се очекува учесниците на самитот да постигнат согласност со цел помош на цивилното население во Сирија, да се изнајдат економски можности со цел обезбедување на работни места за бегалците, како и еднаков пристап до образовниот систем за децата – бегалци. Крајната цел, според најавата на организаторите е да се намали приливот на бегалци кон европските земји.
Домаќин на конференцијата е Премиерот на Велика Британија, г. Дејвид Камерон во заедничка соработка со Емирот на Државата Кувајт, Н.В. Ал-ахмад Ал Јабер Ал-Сабах, Канцеларот на Сојузна Република Германија, г-ѓа Ангела Меркел, Премиерот на Кралството Норвешка, г-ѓа Ерна Солберг и Генералниот секретар на ОН, г. Бан Ки-мун.
На самитот е најавено учество на лидерите на повеќе од 70 држави од светот, претставници на ОН, претставници на меѓународни и регионални организации, како и претставници од невладиниот и од приватниот сектор.