Во наредните неколку дена Агенцијата за промоција и поддршка на туризмот ја промовира Македонија пред белгиските туристи на саемот за туризам во Брисел. Тур операторот Томас Кук-Белгија ја зајакнува својата соработка со македонските тур оператори со што Македонија веќе се најде на нивниот продажен каталог за 2016 година. Од Томас Кук – Белгија велат дека расте и интересот за Македонија од страна и на нивната продажна мрежа во светот.
„Како и секоја година, така и оваа Република Македонија учествува на саемот за туризам во Брисел што претставува значаен придонес како за туризмот, така и за целокупната економија. Ова е можност граѓаните на Белгија да се запознаат со туристичката понуда на Македонија која може да им понуди она што белгијците го немаат” – изјави г-дин Лазар Еленовски, амбасадор на Република Македонија во Белгија.
На саемот за туризам во Белгија делегација на АППТ одржа состаноци и со најголемите Белгиски и Европски туристички организации и асоцијации – “Association of Belgian Tour Operators” (Асоцијација на белгиски туристички организации), “The European Travel Agents and Tour Operators Associations”(Европска асоцијација на туристички агенции и тур оператори) и“BelgiumTourismOrganization” (Туристичка организација на Белгија), од кои произлегоа одлични можности за ширење на мрежата на соработници на Македонија во Белгија. “Salon des Vacances” е најголем саем за туризам во Белгија каде што својата понуда ја изложуваат околу 500 дестинации од светот, а ко-учесници на македонскиот штанд се и ТА Фибула и Бохемиа.