До 20ти мај треба да пристигнат вакцините против „јазлеста кожа“ кај говедата за што се обезбедени еден милион евра. Надлежните засега успешно се справуваат со појавата на оваа болест, делувајќи секојдневно на терен заедно со сточарите и ветеринарните служби, истакна на прес-конференција заменик-министерот за земјоделство, шумарство и водостопанство Ванчо Костадиновски, отфрлајќи ги како невистини обвинувањата на дополнителниот заменик Љупчо Николовски дека Агенцијата за храна и ветеринарство навреме не реагирала и не презела соодветни мерки за справување со болеста. Уште еднаш, во недостиг на идеи и конкретни проекти, рече тој, Николовски шири лаги за да ја дезинформира јавноста и да добие политички поени.
Според директорот на АХВ Зоран Поповски, усмртени ќе бидат вкупно 132 говеда.
„Тоа потврдува дека менаџирањето со болеста до овој момент е успешно. За споредба можеме да ја земеме Бугарија, каде се убиени 7.000 грла“, посочи Поповски.
Тој информира дека, покрај набавката на вакцините, превентивно се преземени и други мерки, согласно ЕУ стандардите и препораките за справување со оваа болест кои ги дава ОИЕ.
„По усмртувањето на говедата, се врши дезинфекција на сите места кои биле во контакт со заболените животни: одгледувалиштата, превозните средства, механизацијата, луѓето и опремата“ – објасни Поповски.
Болеста „јазлеста кожа“ во Македонија првпат беше потврдена на 22-ри минатиот месец. Засега има шест жаришта, но, како што нагласи Поповски, не е исклучена можноста од нејзино натамошно ширење.
„Јазлеста кожа“ се појави прво во Грција, па во Бугарија и за тоа знаеја цел Балкан и цела Европска унија. Но, нема мерка што може да се преземе пред да се појави болеста во одредена земја. Затоа, се делува превентивно, преку обуки на ветеринарите и сточарите за рано препознавање на болеста како единствена мерка“, објасни директорот на АХВ.
Вирусот, додаде тој, се шири многу лесно, преку комарци, мушички, а предвидувањето на Европската комисија е дека до 2017 година болеста „јазлеста кожа“ ќе стигне до Норвешка.