Согласно Законот за управување со електрична и електронска опрема и електрична и електронска отпадна опрема Градоначалникот на Општина Дебрца, Игор Трајкоски потпиша Меморандум за разбирање и Договор за меѓусебна соработка помеѓу Општината Дебрца и лиценцираниот овластен собирач на отпадна електронска електрична опрема фирмата ЕЛКОЛЕКТ ДОО Скопје.
Од страна на овластениот собирач на овој вид на отпад е обезбеден соодветен еко магацин за собирање и складирање на електронска и електрична отпадна опрема, како и времени садови за одлагање на отпадна електрична и електронска опрема.
Локацијата одредена од Општина Дебрца за собирање на електрична и електронска отпадна опрема од домаќинствата се наоѓа спроти општинаската зграда во с. Белчишта. На оваа локација е поставен Еко магацин за одлагање на отпадна електрична и електронска опрема обезбеден од страна на фирмата ЕЛКОЛЕКТ.
На оваа локација населението од општината согласно листата на видови на отпад ќе може да ја одлагаат следната електрична и електронска отпадна опрема:
Неупотребливи големи домашни апарати (фрижидери, електрични шпорети, микро печки, решоа, клима уреди, машини за перење и др.);
Неупотребливи мали домашни апарати (телевизори, радио апарати, фенови, миксери, пегли, тостери, аудио системи, правосмукалки и др.);
Неупотреблива информатичка и телекомуникациска опрема (компјутери, тастатури, опрема за копирање, безжични и мобилни телефони, адаптери, дигитрони и др.);
Неупотребливи електрични и електронски апарати (бор машини, брусалици, машини за мелење, за сечење, за стружење, пили, машини за шиење и др.);
Неупотребливи апарати и инструменти за мерење и контрола (разни автомати, термостати и др.).
Со оглед дека отпадот од електронска и електрична опрема и апарати не смее да се меша и одлага во садовите за комунален отпад се известуваат и замолуват граѓаните и правните лица дека законска обврска е издвојување и одлагање на отпадот од електрична и електронска отпадна опрема.
Контролата и складирањето на електронскиот отпад ќе го спроведува Јавното комунално претпријатие „ДЕБРЦА“ – с. Белчишта.
